Հայաստանի Փորձաքննությունների ազգային բյուրոյում դասընթացներ են անցկացվում՝ փորձաքննությունների անցկացման հարցում մասնագիտական ունակությունների բարձրացման նպատակով: Դրանց մասնակցում են իրավասու մարմինների՝ Ոստիկանության, Քննչական կոմիտեի, դատախազության, օպերատիվ-քննչական ծառայության եւ Ֆինանսների նախարարության ներքին անվտանգության վարչության աշխատակիցները:

NEWS.am-ի հետ զրույցում Փորձաքննությունների ազգային բյուրոյի կրթական բաժնի ղեկավար Էդվարդ Մանուկյանը նշեց, որ 10-օրյա դասընթացներն անցկացվում են պետպատվերի շրջանակում:

«Ծրագրերը մշակվում են յուրաքանչյուր մասնագիտական խմբի համար: Հարկայինի աշխատակիցների համար՝ հիմնական տնտեսական հանցագործությունների մասով: Քննչական կոմիտե քննիչների համար՝ դեպքի վայրի պահպանության, թմրանյութերի եւ այլնի մասով: Ծրագրերը կազմում են փորձագետները, եւ հաստատվում են գիտխորհրդի կողմից»,- տեղեկացրեց Էդվարդ Մանուկյանը:

Դասընթացների ավարտից հետո մասնակիցները թեստ կլրացնեն եւ վկայական կստանան: Էդվարդ Մանուկյանի խոսքով, այս դասընթացների մասնակիցները հետագա երեք տարիների ընթացքում նորից պետք է կուրսերի մասնակցեն, քանի որ տեխնոլոգիաները կատարելագործվում են, նոր մեթոդներ եւ սարքավորումներ են ի հայտ գալիս: Տարեկան դասընթացներին 360 մասնագետ է մասնակցում:

Հարցին, եղե՞լ են դեպքեր, երբ ունկնդիրը չի կարողացել հաջողությամբ հանձնել թեստը, Էդվարդ Մանուկյանը պատասխանեց, որ մի քանի դեպք եղել է, երբ քննիչները դասընթացներից բացակայելու պատճառով վկայական չեն ստացել: «Մենք համապատասխան նամակ ենք ուղարկել նրանց գերատեսչություններին: Իսկ հետեւանքների մասին ոչինչ ասել չեմ կարող, դա մեր իրավասության շրջանակում չէ»,- նշեց Մանուկյանը:

28 Դեկտեմբեր 2016